حوار البيض و”الفشفاش”

- يا نهار أغبر .. البيضة قرّبت من 3 جنيهات

* طيب إيه المشكلة .. الدنيا ولعت في كل الأسعار .. اشمعنى البيضة يعني؟

- كنت باعمل 3 بيضات أوملت أو عجة بالطماطم والبصل، يفطّروا العيلة، مع جنيه عيش.

- يبئا الفطور لخمسة أفراد على الأقل، عدى بأربعة جنيهات.

* يعني المشكلة حاليا أصبحت في إن الإجمالي ده ارتفع لحوالي 10 جنيهات لفطور بيض أوملت، أو عجة؟

- طبعا .. دي حاجة بئت نار.

- طيب لو قلبناه فول وطعمية وحتة جبنة، الحسبة هاتكون كم؟

* ماليش فيه .. عارفة اللي هاتقوله .. وقرأناه ألف مرة: الفول والطعمية أكلة غير صحية .. الطعمية مقلية بزيت سيء، والفول مطبوخ بمسحوق العفريت (إديتا)، ودي سبب رئيسي لهشاشة العظام، لأنها بتمسك الكالسيوم، فيطلع خارج الجسم.

* وفطور العيلة محتاج 20 جنيه فول وطعمية، غير العيش.

- طيب لو فكرتم تفطروا فول وبطاطس شرائح مقلية ومعبأة في أكياس "فشفاش" بدون ما نذكر اسم معين؟

* وأنا أجيب الحاجات دي ليه، دي محتاجة فلوس كتير، كل فرد عاوز كيس من اللي سعره وصل 5 جنيهات، ووزن الكيس نقص بمقدار الثلث، يعني كدا 25 جنيه لخمسة أكياس، ومش هانشبع.

- يعني البيض أفضل وأرخص، لأنه في النهاية بروتين؟

* بس برضه غال .. البيضة كانت بستين قرش السنة اللي فاتت زي الوقتي.

- وكيس الفيشفاش كان بكم، وبئا بكم؟

* أبو خمسة حاليا كان بثلاثة .. وكان وزنه أكبر.. وحاليا منفوخ هوا.

- طيب تعرفي الفرق بين البيض والفشفاش صحيا وغذائيا؟

* كله أكل وخلاص.

- بس البيضة بتشبع عيل، لكن الكيس دا مجرد تسالي جنب الأكل، أو بين الوجبات للعيال، وبيتسبب في سمنة مفرطة وبلاوي للأطفال والكبار كمان.

- عشان كدا هاكرر السؤال: إيه الفرق في القيمة الغذائية والصحية بين البيض و"الفشفاش"؟

* لا ما عرفش بصراحة.

-البيضة الواحدة فيها حوالي 7 جرامات بروتين، ووزنها الصافي حوالي 58 جراما، وفيها دهون، وأحماض أمينية، وفوسفور، وفعلا البيضة الواحدة تكفي كوجبة غذائية متكاملة لطفل، وبيضتين يكفوا وجبة للإنسان من سن البلوغ حتى نهاية العمر، و3 بيضات يكفوا وجبة الأم الحامل.

- والأكياس اللي انت بتسميها "فيشفاش"؟

* دي بطاطس .. يعني نشويات .. لكنها اتحمرت بزيت مشبع طويل السلسلة، خال من الأحماض الدهنية الصحية، والزيت ده سبب ترسيب الكولسترول الضار، وأمراض القلب والشرايين.

- أنا مصرة إن البيض سعره نار.

* طيب نحسبها كوحدات بروتين، على طريقة خبراء التغذية. وجبة الإنسان البالغ من اللحمة قطعة وزنها 90 جرام .. يعني تمنها 13.5 جنيه … بفرض إن سعر كيلو اللحمة 150 جنيه.

* وخبراء التغذية قالوا 3 بيضات، يساووا وجبة لحمة. فلو فرضنا إن البيضة بسعر 3 جنيهات، هاتكون الحسبة 9 جنيهات لوجبة البيض .. يعني فيه 4.5 جنيه فرق، وباقي معانا ميزة البعد عن النقرس، واستفادة مرضى الكبد والكلى في استيفاء حقهم من البروتين المناسب لهم من مصدر البيض.

- أنا مقتنعة جدا .. بس كدا لا هاقدر على سعر البيض .. ولا سعر اللحمة .. فنركز على الفول لحد ما ربنا يفرجها.